Staðir – Vefsetur Grétars

18. júní, 201618. júní, 2016

Urðarjöklar í nágrenni Akureyrar

Ágúst Guðmundsson sendir nokkrar myndir af uðarjöklum í nágrenni Akureyrar

Fyrsta myndin er af Lambárjökli í Glerárdal. Þessi jökull kemur úr skál norðan í Kerlingu og er ís efst en hulinn grjóti þegar neðar dregur. Þarna er því lifandi urðarjökull, eða slíkur jökull í myndun.

Næsta mynd sýnir Möðrufellið (sem nú er kallað Möðrufellsfjall) og urðarbinginn Möðrufellshraun. Þessi mynd er tekin af jörðu niðri. Hér er dauður eða óvirkur urðarjökull.

Þriðja myndin er líka af Möðrufellshrauni og nágrenni, en er tekin úr lofti.

Möðrufellshraun og umhverfi þess úr lofti.

Fjórða myndin er loftmynd af öxlinni austan í Kerlingu, þarna heitir Espihólsmúli samkvæmt Örnefnasjá LMI.

Síðasta myndin er af sama stað, en tekin af jörðu niðri.

Myndirnar eru líka í myndasafninu.

21. maí, 201620. júní, 2016

Skreppa sem varð að landafundaferð

Í lok júní 2008 fórum við Grétar G. Ingvarsson í smá skreppu með tvo vini okkar, þá Jóhann Björgvinsson og Örlyg Arnljótsson, sem ætluðu að ganga Biskupaleið frá Veggjafelli nyrst í Herðubreiðarfjöllum vestur og norður á Heilagsdal.

Í þessari ferð uppgötvuðum við nýtt og mjög athyglisvert landsvæði. Um þetta ferðalag okkar má lesa í greininni „Landafundaferð“ á skráasafninu og myndir af svæðinu eru í myndasafninu „Herðubreiðarfjöll – Hvammfjöll“.

10. maí, 201619. júní, 2016

Schauinsland

Myndin hér að ofan er tekin uppi á fjalli sem heitir Schauinsland. Fjallið er 1284 m.y.s. og er í Svartaskógi í Þýskalandi. Schauinsland er „húsfjall“ („hausberg“) í borginni Freiburg im Breisgau og er hækkunin frá bænum og upp á topp um 1000m. Fjallið er ca. 10km suður frá bænum, en innan marka sveitarfélagsins.
Hægt er að aka langleiðina upp eftir malbiki, en algengast er að taka almennings samgöngur borgarinnar (sporvagn/rútu) að neðri enda kláflyftunnar og fara upp með einum klefanum. Lyftan er um 3,6km að lengd og hækkunin um 700m.
Hér er hægt að skjótast í snögga ferð (45s) frá miðpunkti bæjarins, Bertholdsbrunnen, og upp í endastöð kláfsins.

Á vetrum er þarna skíðasvæði en göngu- og fjallahjólastígar eru mikið notaðir á sumrin. Á öldum áður var unnið silfur úr námum í fjallinu og byggðist auður borgarinnar á þessum námugreftri á sínum tíma. Í þjónustuhúsinu við enda kláflyftunnar er matsala og þaðan má fara í neðanjarðasafn um námugröftinn.